domingo, 4 de febreiro de 2024

Costa de Lugo 2

 2ª etapa do Camiño pola costa de Lugo seguindo a ruta do Cantábrico, co tren como transporte

Concello: O Vicedo
Transporte: Feve (horarios)
Distancia: 13,3 km
Tempo: 4,x h
Desnivel: 420 m

Partimos da estación de O Vicedo ca a praia de Xilloi, para continuar onde o deixamos no tramo anterior
Punta Cameiro frente a Illa Coelleira
Miradores Tixoso, Moreiras , Ribeira e Punta Lodelas
Praia de San Román
Opción: deixar os primeiros tres km da senda sen facer e ir ao Fuciño do porco
Regreso no apeadoiro do Folgueiro

Costa de Lugo 1

 

Camiñamos pola costa de Lugo seguindo a ruta do Cantábrico, co tren como transporte

    

Concello: O Vicedo
Transporte: Feve (horarios)
Distancia: 10,5 km
Tempo: 4 horas
Desnivel: 250 m
    
    Procedentes de calquera punto da costa de Lugo, chegamos á estación de O Barqueiro á unha de mediodía, paralelo ao andén temos o camiño natural da ruta do Cantábrico polo que comenzamos a camiñar cara ao leste para cruzar a Ría do Barqueiro, pola ponte de ferro  e entrar na provincia de Lugo.






En baixamar pódese chegar ao Vicedo pola fermosa praia de Arealonga, coa marea alta haberá que seguir as indicacións da senda costeira que tamén sairán á praia algo mais adiante.
Pasada a praia dos Castelos hai un paseo con moitos bancos, perfectos para comer e sen demorarse moito continuar coa senda polo porto, a praia do caolín e por fin a praia de Xilloi, desde a que volvemos ao Vicedo para coller o tren que pasa  (febreiro 2024) ás 17:12.
Este tramo é breve por dispoñer tan só de catro horas para realizalo. 

domingo, 3 de decembro de 2023

Castropol Ribadeo polo camiño de Santiago e a senda costeira

Concello: Castropol

Lugares: O Valín, Berruga, As Campas , Barres, Donlebún, As Figueiras. Ribadeo

Distancia: 13,5 km

Desnivel: 166 m

Transporte: Feve 

Percorrido: Sáese da estación de Castropol pola pista alquitranada e cóllese tres veces á esquerda para situase na pista que vai pola aba do pico San Marcos. Xa estamos no camiño de Santiago e por el se sigue entre piñeiros ou árbores de ribeira ata aproximarnos Ás Campas e despois por lugares mais abertos e xa con algunha vivenda ata achegarnos ao campo de futbol de Barres.

Cruzamos a estrada e rodeando a Igrexa de San Esteban imos cara a Donlebúne a senda costeira que seguimos ata As Figueiras, lugar que merece un paseo polas súas escaleiras e calellas.

Pasamos a ponte, e xa eatamos de volta  en Ribadeo


xoves, 1 de xuño de 2023

Río Suarón: De Piantón a Meredo



Concello: A Veiga                                                        
Lugares: Piantón, Arcilo, Sestelo, Meredo, Cobre, Piantón
Distancia: 12 km (+ 6 indo na FEVE)
Track:  Wikiloc



Percorrido: Saíndo de Piantón pola  ponte de tres arcos, sóbese polo camiño de Arcilo e de alí a Cobre por unha pista alcatranada, que acaba na casa máis alta, gallando en dúas pistas de terra, cóllese á dereita para ir ata El Foxo. Ao chegar á estrada e atravesala, un camiño de terra segue a Grandameá onde volvemos á estrada, uns metros, ata outro camiño á esquerda que nos leva por encima da xeral, desde Grandameá ata Xaraz.

Neste tramo vemos Meredo onde destaca a casona palacio de Rodríguez de Cancio (s,XVIII) e a igrexa parroquial Santa Marina con planta de cruz latina.sempre á esquerda pásase o núcleo de Xaraz, e despois a fonte. Pola pista de terra, desde onde se ven na ladeira da enfronte ata tres cortíns, construccións circulares para protexer os trobos, continúase uns metros atendendo ao carreiro que logo se atopa para baixar á dereita ao aparcamento do mazo.         
   
Báixase ao mazo, restaurado, é o lugar para refrescarse e comer. De volta ao aparcamento iníciase a subida por onde se baixou, e ao 10 metros  aproximadamente entra un carreiro á dereita que con unha subida suave volve ao camiño  que viña de Xaraz ancho e fácil de andar.
            Ao ir subindo, vese, sobre o mazo, o monte do Castelo, onde segundo Castrillón estivo o Castelo do Suarón., fortificación medieval que foi centro de actividades e capital militar do territorio denominado Honor del Suarón  situado entre as rías de Navia e Ribadeo, desde o mar ata Pesoz.


Poucos metros mais adiante está a mina da Cancelúa, para visitala é preciso levar lanterna.. Seguimos por un bosque de carballos, loureiro acivro e aloliqueiras  ou madroños ata chegar a altura da casa de Sestelo: caserón construído no século XIX como fábrica de papel, que se empregou como orfanato dende 1937 ata o 51. Hoxe está parcialmente reconstruída. Ten presa para a central eléctrica propia e unha finca con variedade de árbores.
            Segue un carreiro monte arriba ata unha pista ancha de terra  que desemboca nunha alcatranada, fronte a Samagán, pola que se continúa ata completar unha curva pronunciada en U. Déixase a estrada por unha pista de terra que baixa cara ao río e pouco antes de chegar a auga, xunto a un poste de alta tensión, cámbiase a un camiño con herba, e auga, que vai á zona de baños de Piantón. 

Desde alí sube en zig-zag e continúa paralela ao Suarón ata regresar a Piantón, antiga capital do concello de Vegadeo, onde destacan a praza, a igrexa parroquial de San Esteban (s XVI-XVII). con tres retablos de imaxinería barroca, e a casona rural Casa do Rego  có seu pombal octogonal
Teresa Díaz Estévez

domingo, 30 de abril de 2023

Río Masma



Distancia: 16 km por pistas de terra e moito alquitrán

Concellos: Foz e Barreiros

Lugares: O Centiño, A Espiñeira, Celeiro, Merille, San Cosme.

Transporte: FEVE

Track: Wikiloc

Percorrido: Saíndo da estación de Foz, ir á Espiñeira, e polo camiño de San Rosendo ir ao son do Masma ata a ponte de Rexa.
Tamén se pode atravesar pola ponte anterior, do Barral, e queda o paseo nos 12 km de rigor.
Pasar ao concello de Barreiros e voltar pola outra beira, augas abaixo ata sair á estrada. 
Opción 1 Haberá que ir por a estrada, con todo o cuidado uns 50 m para atravesala e ir por unha pista agora escuitando o rego do Santo Estebo ata estar baixo a autovía que non atravesamos aínda que si un dos seus accesos . 
Opción 2  Cruzar a estrada e subie  ata unha pista paralela á xestrada que collendo  á esquerda nos leva a pasar sobre a autovía e continuamos  sempre cara á esquerda, pola vía de servicio , que rematará ao chegar ao punto no que a autovía pasa a ser aérea. Haberá que baixar por un carreiro costo e pasar un regato para enlazar coa pista que vai baixo a autovía, agora indo á dereita.
E seguimos por Merille a San Cosme.
Nada que ver este percorrido cos dos ríos anteriores. 

martes, 28 de marzo de 2023

Río Ouro


Concello: Foz

Parroquia:Fazouro                
Distancia:11km                               
Desnivel: Inapreciable
Transporte: FEVE (consultar horarios)
Percorrido: Comézase a camiñar no apeadoiro de Fazouro para ir cara ao mar, caendo á esquerda a visitar uns restos arqueolóxicos. Trátase dun castro litoral romanizado. As bases das vivendas son rectangulares, a diferencia das de castros anteriores que eran circulares; a estructura do conxunto é pentagonal, ocupando 7000 m2.
Séguese a liña de costa ata chegar a desembocadura do Río Ouro, fronte a praia da Pampillosa. Pásase baixo as pontes do tren e da estrada e xunto a ponte de ferro que era parte da N634. Vaise á beira do río por un tramo asfaltado, pásase a igrexa, o cemiterio de Fazouro e o río por unha ponte de pedra. 


A poucos metros hai unha pista de terra á dereita onde se ve o primeiro dos indicadores da senda que ao longo de cinco quilómetros vai por paraxes cada vez mais agrestes.
Parece que se viaxa no tempo, pasando do canal de fibrocemento a unha canalización feita na rocha e do bosque seco de eucalipto a lugares húmidos, con árbores propios e antigos. Tamén lembra outra época o pazo dos Condes de Fontao, relacionado coa concesión do condado de Foz, en tempos de Isabel II.  
  

O final da senda un salto de auga represada desde o que se volverá ao apeadoiro de Fazouro, onde haberá que estar antes das 17:50.  
Como este paseo é pequeno e sobra tempo, é mellor continuar pola senda costeira ata chegar a praia de Llas, onde iremos, pola rúa Torques do castro, ao apeadoiro de Marzán e aínda se pode tomar o café no bar que está frente á gasolineira.
               Teresa Díaz Estévez



mércores, 1 de marzo de 2023

Río Xunco


Concello: Cervo
Distancia: 14 km

Transporte: FEVE

Sinopse: O paseo vai ao son do Río Xunco, que dende a Praia de Rueta vai ao Paseo dos Namorados en Sargadelos.
Percorrido: Utilizando como medio de transporte o FEVE o paseo comeza, e remata, na parada de Madeiro, ao baixar do tren imos á esquerda para saír á estrada da costa que logo cruzaremos e deixaremos para dirixirnos á praia de Rueta, sen baixar ao areal, na curva na que temos unha linda vista da desembocadura do río Xunco, temos tamén, a nosa dereita, a entrada dun carreiro que atravesa as vías do tren e vai un par de quilómetros á beira do río. 
O camiño está limpo e ben trazado, entre as frondosas e a vexetación de ribeira con grandes fieitos, facendo o paseo moi grato. Unha vez na estrada xeral hai que atravesala e camiñar pola beira do río, agora á nosa dereita. Pásase o río, mais adiante por unha fermosa ponte de pedra e aínda que logo sae a unha estrada, vólvese a baixar e pasar a ponte para seguir co río á nosa dereita ata saír a un muiño cerca da Praza do Souto, centro de Cervo, no que está o Ecomuseo Terras de Azul Cobalto e o Parque da Lobeira.

O paseo continúa, sempre á beira do río, por detrás do Ecomuseo, enlazando co camiño real e pasa polos vestixios da antiga fábrica de Louza e polos Muíños, chegando ata a Fonte da Tella, no Conxunto Histórico Artístico de Sargadelos: Sala de Arte nas antigas carboeiras, os cuarteis restaurados, muros dos edificios da antiga fábrica de fundición, as bocas dos fornos, senda botánica, Paseo dos Namorados, o museo da Casa de administración, o Pazo de Ibáñez, …. Para ver todo esto fai falta mais tempo do que dispoñemos, así que daremos a volta no muíño do Mornelo, e para a interesante visita relativa a Sargadelos, recomendo ir por semana, a Cervo, no autobús das 11 e regresar no das 5 ou no das 7 da tarde 

  
Dependendo do transporte público, convén ter calculado o tempo necesario para o regreso que será polo mesmo camiño. 
Teresa Díaz Estévez